Хан хуурчдын удам л Хаан сэнтийд заларч, хамаг олноо мэдэн захирдаг байсан уламжлалт ёсыг зөрчиж улсын эзэн болсон Иглэр хэмээх харгис догшин нэгэн эр байжээ. Тэрээр өөрийн удмыг эгнэгт хаан байлгахын тулд яруу эгшиглэнг устгана гэж ам тангараг тавьж, орон дэлхийн бүх хуурчдыг алж, хуур хөгжмийг хуу хаман шатааж, ард олныг дарангуйлан захирсаар хорин оныг үднэ. Гэвч түүнд удам залгах үр заяасангүй. Иглэр хаан өвлийн нэгэн өдөр их авд мордож цуст хядлага үйлдэнэ. Гэтэл түүний харвасан сүүлчийн суманд оногдсон зээр нь хээлтэй шаргачин байж таарна. Хөхөө өвлийн хүйтэнд байж боломгүй зүйлтэй учирсан Иглэр хаан үүнийг “Үртэй бол” гэсэн тэнгэрийн дохио хэмээн сэтгээд ордон руугаа яаран буцна.